Saga Ölfusborga
Tímalína Ölfusborga
Saga Ölfusborga á rætur að rekja til réttindabaráttu launafólks um orlof. Hér er sagan rakin frá setningu orlofslaganna árið 1943, í gegnum uppbyggingu og afhendingu Ölfusborga og áfram til dagsins í dag.
1943
10. febrúar 1943
Lög um orlof launafólks
Lög um orlof launafólks eru samþykkt á Alþingi, í kjölfar þess að ákvæði um orlofsrétt rötuðu inn í almenna kjarasamninga. Í fyrstu var miðað við tólf launaða orlofsdaga en þeim átti eftir að fjölga á næstu árum.
1957
Framlag ríkisins
Ríkisstjórnin veitti á árunum 1957 og 1958 nokkuð fé í orlofshúsasjóð verkalýðshreyfingarinnar. Rétt fyrir ríkisstjórnarskipti í lok árs 1958 gaf Hannibal Valdimarsson félagsmálaráðherra, sem jafnframt gegndi starfi forseta ASÍ, loforð fyrir landi undir orlofshúsabyggð.
1962
Jarðnæði
Landbúnaðarráðherra lætur ASÍ í té tólf hektara landspildu úr landi Reykja. Undirbúningur að orlofshúsabyggðinni hefst að kappi. Ráðist er í jarðvegsvinnu og Sigvalda Thordarsyni arkitekt falið að hanna húsin. Fyrstu orlofsgestirnir gista á svæðinu í júní 1964.
1965
12. september 1965
Afhending Ölfusborga
Orlofsheimilin undir Reykjafjalli í Ölfusi voru afhent Alþýðusambandi Íslands. Hannibal Valdimarsson, forseti ASÍ, veitti byggingunum viðtöku með ræðu, skýrði frá sögu orlofsheimilanna og kunngjörði hið nýja nafn hverfisins — Ölfusborgir.
1966
Upphaf Ölfusborga
Ölfusborgir taka til starfa sem orlofsbyggð verkalýðshreyfingarinnar.
1968
Menningar- og fræðslumiðstöð alþýðu
Menningar- og fræðslumiðstöð alþýðu er komið á laggirnar að norrænni fyrirmynd. Meðal helstu viðfangsefna hennar er rekstur Félagsmálaskóla alþýðu, sem ætlað er að þjálfa trúnaðarmenn verkalýðshreyfingarinnar. Um árabil voru Ölfusborgir meginvettvangur þeirrar fræðslu.
1973
23. janúar 1973
Eldgos í Heimaey
Eldgos hefst í Heimaey og allir íbúar Vestmannaeyja neyðast til að flytja upp á fastalandið. Stór hópur fær inni í Ölfusborgum. Verkalýðsfélögin bregðast við með því að leigja Héraðsskólann að Reykjum í eitt sumar fyrir félagsmenn sína.
1977
17. júlí 1977
Umfjöllun í Þjóðviljanum
„Skammt fyrir austan Hveragerði gefur að líta húsaþyrpingu uppi í hlíðinni. Á grænu túni standa 36 sérkennileg hús og um byggðina miðja rennur lækur og myndar foss í brattanum. Þetta eru orlofsheimili Alþýðusambands Íslands.“
1988
Loftmynd 1988
Árið 1988 flaug Mats Wibe Lund yfir borgirnar og sést vel á myndinni hve skammt allur trjágróður er kominn á veg. Húsin eru öll komin upp.
2005
14. september 2005
40 ára afmæli Ölfusborga
Þann 14. september var haldið upp á 40 ára afmæli Ölfusborga. Í tilefni af því voru gróðursett tré í veðurblíðunni og gestir nutu góðra veitinga í þjónustumiðstöðinni.
2012
Loftmynd 2012
Mats Wibe Lund flaug yfir svæðið árið 2012 og þar er trjágróður kominn vel á veg frá 1988 og nokkur skjólbelti komin til viðbótar.
2016
12. nóvember 2016
50 ára afmæli Ölfusborga
Þann 12. nóvember 2016 var haldið upp á 50 ára afmæli Ölfusborga. Í því tilefni var afhjúpað söguskilti við klettinn efst á svæðinu. Skiltið hannaði Guðrún Tryggvadóttir listamaður í Ölfusi og Stefán Pálsson sagnfræðingur hélt tölu og fór yfir helstu atriði.
Sagan heldur áfram
Saga Ölfusborga endar ekki hér. Svæðið heldur áfram að þróast og taka breytingum, á sama tíma og varðveitt er það sem hefur einkennt Ölfusborgir frá upphafi — kyrrð, náttúra og samvera.
Áttu sögu úr Ölfusborgum?
Við viljum varðveita sögur og minningar sem tengjast Ölfusborgum. Ef þú átt ljósmyndir, frásagnir eða annað efni úr sögu svæðisins viljum við gjarnan heyra frá þér.
Deila sögu eða myndum